തവക്കല്‍ന ആപ്പില്‍ പുതിയ മാറ്റങ്ങളോടെ സൗദി

റിയാദ് : സൗദിയില്‍ പുറത്തിറങ്ങാന്‍ രണ്ട് ഡോസ് വാക്‌സിന്‍ നിര്‍ബന്ധമാണെന്ന വ്യവസ്ഥ നടപ്പിലായതോടെ കൊവിഡ് പ്രതിരോധ മൊബൈല്‍ ആപ്ലിക്കേഷനായ തവക്കല്‍നയിലും അതിന് അനുസൃതമായ മാറ്റങ്ങള്‍ വരുത്തി. ആപ്പിലെ ഇമ്മ്യൂണ്‍ സ്റ്റാറ്റസ് രണ്ട് ഡോസ് വാക്‌സിന്‍ എടുത്തവര്‍ക്ക് മാത്രമാക്കിയിരിക്കുകയാണ് സൗദി അധികൃതര്‍. ഇതര വിഭാഗങ്ങളെ പ്രത്യേകം സ്റ്റാറ്റസുകളില്‍ തിരിച്ചറിയാനുള്ള സൗകര്യവും ഏര്‍പ്പെടുത്തിയിട്ടുണ്ട്. സൗദി ആരോഗ്യ മന്ത്രാലയമാണ് തവക്കല്‍നയിലെ പുതിയ മാറ്റങ്ങള്‍ സംബന്ധിച്ച വിവരങ്ങള്‍ പുറത്തുവിട്ടത്. ആളുകള്‍ പുറത്തിറങ്ങുന്നിതിന് രണ്ട് ഡോസ് വാക്‌സിന്‍ നിര്‍ബന്ധമാക്കിയ നിയമം ഇന്നലെ മുതല്‍ പ്രാബല്യത്തിലായ സാഹചര്യത്തിലാണ് മാറ്റം. ഇതോടെ, തവക്കല്‍നാ ആപ്പില്‍ ഇമ്മ്യൂണ്‍ സ്റ്റാറ്റസ് ഇല്ലാത്തവര്‍ക്ക് പൊതു ഇടങ്ങളില്‍ പ്രവേശിക്കാനാവില്ലെന്ന സ്ഥിതി വന്നിരിക്കുകയാണ് സൗദിയില്‍.

പുതിയ തീരുമാനത്തിന്റെ അടിസ്ഥാനത്തില്‍ രണ്ട് ഡോസ് വാക്‌സിന്‍ പൂര്‍ത്തിയാക്കിവര്‍ക്ക് മാത്രമാണ് ഇനി മുതല്‍ തവക്കല്‍നയില്‍ ഇമ്മ്യൂണ്‍ സ്റ്റാറ്റസ് ലഭിക്കുക. ഒരു ഡോസ് വാക്‌സിന്‍ മാത്രം എടുത്തവരെ ആദ്യ ഡോസ് എടുത്തവര്‍ എന്ന് പ്രത്യേകമായി കാണിക്കും. നേരത്തേ ഇവര്‍ക്ക് ഇമ്മ്യൂണ്‍ ബൈ ഫസ്റ്റ് ഡോസ് എന്ന സ്റ്റാറ്റസാണ് ഉണ്ടായിരുന്നത്. പുതിയ തീരുമാന പ്രകാരം ഒന്നാം ഡോസ് വാക്‌സിന്‍ എടുത്തവര്‍ക്കുള്ള ഇമ്മ്യൂണ്‍ സ്റ്റാറ്റസ് 180 ദിവസത്തില്‍ നിന്ന് 90 ദിവസമായി കുറച്ചിരിക്കുകയാണെന്നും അധികൃതര്‍ വ്യക്തമാക്കി. ഫസ്റ്റ് ഡോസ് എടുത്ത് 90 ദിവസം കഴിഞ്ഞവരുടെ സ്റ്റാറ്റസ് രോഗബാധ സ്ഥിരീകരിച്ചിട്ടില്ല എന്നായി മാറും. സെക്കന്റ് ഡോസ് എടുക്കുന്നത് വരെ ഈ സ്റ്റാറ്റസ് തുടരുമെന്നും അധികൃതര്‍ അറിയിച്ചു. രണ്ടാം ഡോസ് സ്വീകരിച്ചു കഴിഞ്ഞാല്‍ ഇമ്മ്യൂണ്‍ സ്റ്റാറ്റസ് തിരിച്ചുവരും. നേരത്തേ ആദ്യ ഡോസ് എടുത്ത് 14 ദിവസത്തിനു ശേഷം 180 ദിവസം വരെ ഇമ്മ്യൂണ്‍ സ്റ്റാറ്റസ് ലഭിച്ചിരുന്നു. അതിനാണ് പുതിയ തീരുമാനത്തോടെ മാറ്റം വന്നിരിക്കുന്നത്. ഇനി മുതല്‍ വാക്‌സിന്‍ എടുക്കാന്‍ നിര്‍ദേശിച്ച പ്രായം തികയാത്തവര്‍ക്ക് രോഗം സ്ഥിരീകരിച്ചിട്ടില്ല എന്ന സ്റ്റാറ്റസും, വാക്‌സിന്‍ നിര്‍ബന്ധമുള്ളവര്‍ അത് സ്വീകരിച്ചിട്ടില്ലെങ്കില്‍ പ്രതിരോധ കുത്തിവെപ്പ് എടുത്തിട്ടില്ല എന്ന സ്റ്റാറ്റസുമാണ് ആപ്പില്‍ തെളിയുക. രോഗബാധിതര്‍, രോഗികളുമായി ഇടപഴകിയവര്‍, ഹോം ക്വാറന്റൈനിലും ഹോട്ടല്‍ ക്വാറന്റൈനിലും കഴിയുന്നവര്‍ എന്നി വിഭാഗങ്ങളെയും പ്രത്യേകം സ്റ്റാറ്റസില്‍ തിരിച്ചറിയാന്‍ സാധിക്കും. വാക്‌സിന്‍ സ്വീകരിക്കുന്നതില്‍ ഇളവ് ലഭിച്ച വിഭാഗത്തിനുള്ള നിലവിലെ സ്റ്റാറ്റസ് അതേപടി തുടരുമെന്നും ആരോഗ്യ മന്ത്രാലയം വ്യക്തമാക്കി.

പുതിയ മാറ്റം അനുസരിച്ച് തവക്കല്‍നാ ആപ്പില്‍ രണ്ടു വിഭാഗം ആളുകളുടെ ഇമ്മ്യൂണ്‍ സ്റ്റാറ്റസ് ഒഴിവാക്കി. ഒരു ഡോസ് മാത്രം വാക്‌സിന്‍ എടുത്തവരാണ് ഒരു വിഭാഗം. രോഗമുക്തി നേടിയവരാണ് രണ്ടാമത്തെ വിഭാഗം. ഒരു ഡോസ് വാക്‌സിന്‍ മാത്രം എടുക്കുകയും അതിനു മുമ്പോ ശേഷമോ കൊവിഡ് ബാധിച്ച് രോഗമുക്തി നേടുകയും ചെയ്ത ആളുകള്‍ക്ക് ഇതുവരെ ഇമ്മ്യൂണ്‍ സ്റ്റാറ്റസ് ലഭിച്ചിരുന്നു. പുതിയ മാറ്റം അനുസരിച്ച് കൊവിഡ് മുക്തി എന്നത് തവക്കല്‍നാ ആപ്പിലെ സ്റ്റാറ്റസിനുള്ള മാനദണ്ഡമാവില്ല. പുതിയ മാറ്റംപ്രകാരം ഫൈസര്‍ ബയോണ്‍ടെക്, ഓക്‌സ്‌ഫോഡ് ആസ്ട്രസെനെക്ക, മൊഡേണ എന്നീ വാക്‌സിനുകളില്‍ ഏതെങ്കിലും ഒന്നിന്റെ രണ്ട് ഡോസും ജോണ്‍സണ്‍ ആന്റ് ജോണ്‍സന്റെ ഒരു ഡോസും എടുത്തവര്‍ക്കു മാത്രമേ തവക്കല്‍നാ ആപ്പില്‍ ഇമ്മ്യൂണ്‍ സ്റ്റാറ്റസ് ലഭിക്കൂ. ജോണ്‍സണ്‍ വാക്‌സിന്റെ ഒരു ഡോസ് എടുത്ത് 14 ദിവസങ്ങള്‍ കഴിഞ്ഞവര്‍ക്കും മറ്റ് വാക്‌സിനുകളുടെ രണ്ടാം ഡോസ് എടുത്ത ഉടനെയും പ്രതിരോധ ശേഷി കൈവരിച്ചു എന്ന് കാണിക്കുന്ന ഇമ്മ്യൂണ്‍ സ്റ്റാറ്റസ് ആപ്പില്‍ തെളിയും. സിനോഫാം, സിനോവാക്‌സ് വാക്‌സിനുകളുടെ രണ്ട് ഡോസ് എടുത്തവര്‍ മൂന്നാമതൊരു ബൂസ്റ്റര്‍ ഡോസ് കൂടി എടുത്താല്‍ അവര്‍ക്കും സൗദിയില്‍ ഇമ്മ്യൂണ്‍ സ്റ്റാറ്റസ് ലഭിക്കുമെന്നും മന്ത്രാലയം അറിയിച്ചു. എന്നാല്‍ സൗദിയില്‍ അംഗീകാരമുള്ള മൂന്നിലൊരു വാക്‌സിനായിരിക്കണം മൂന്നാം ഡോസായി സ്വീകരിക്കേണ്ടത് എന്ന നിബന്ധനയുണ്ട്. ഫൈസര്‍, ആസ്ട്രസെനെക്ക, മൊഡേണ വാക്‌സിനുകളുടെ ഒരു ഡോസും സിനോഫാം സിനോവാക് വാക്‌സിനുകളുടെ രണ്ട് ഡോസുകളും മാത്രം സ്വീകരിച്ചവരുടെ ആപ്പ് സ്റ്റാറ്റസില്‍ ഒരു ഡോസ് വാക്‌സിന്‍ സ്വീകരിച്ചു എന്നാണുണ്ടാവുക. ഇവര്‍ക്ക് സൗദിയിലെ പൊതു ഇടങ്ങളില്‍ ഇന്നു മുതല്‍ പ്രവേശനം അനുവദിക്കില്ല.

സമ്പൂര്‍ണമായി വാക്സിനേഷന്‍ സ്വീകരിക്കാത്തവര്‍ക്ക് പൊതു ഇടങ്ങളില്‍ പ്രവേശിക്കുന്നതിന് ആഭ്യന്തര മന്ത്രാലയം ഏര്‍പ്പെടുത്തിയ വിലക്ക് സൗദിയില്‍ ഇന്നലെ മുതല്‍ നിലവില്‍ വന്നു. വ്യാപാര സ്ഥാപനങ്ങള്‍, സര്‍ക്കാര്‍- സ്വകാര്യ ഓഫീസുകള്‍, സ്ഥാപനങ്ങള്‍, പൊതു ഗതാഗത സംവിധാനങ്ങള്‍, തൊഴിലിടങ്ങള്‍, ടൂറിസം കേന്ദ്രങ്ങള്‍, ബീച്ചുകള്‍, പാര്‍ക്കുകള്‍, വിനോദ കേന്ദ്രങ്ങള്‍ തുടങ്ങിയ സ്ഥലങ്ങളില്‍ ഇനി മുതല്‍ രണ്ട് ഡോസ് വാക്‌സിന്‍ സ്വീകരിച്ചവര്‍ക്ക് മാത്രമേ പ്രവേശനമുള്ളൂ. രാജ്യത്ത് കൊവിഡ് വ്യാപനം കുറഞ്ഞ സാഹചര്യത്തില്‍ ജീവിതം സാധാരണ നിലയിലേക്ക് തിരിച്ചുകൊണ്ടുവരാനുള്ള ശ്രമത്തിന്റെ ഭാഗമായാണ് നടപടി. ഇതിന്റെ ഭാഗമായി വ്യാപാര, വാണിജ്യ പ്രവര്‍ത്തനങ്ങള്‍ക്കും ടൂറിസം, എന്റര്‍ടെയിന്‍മെന്റ് പരിപാടികള്‍ക്കുമുള്ള നിയന്ത്രണങ്ങള്‍ സൗദി ഒഴിവാക്കിയിരുന്നു. ഇവിടങ്ങളില്‍ പൂര്‍ണമായി വാക്‌സിന്‍ എടുക്കാത്തവര്‍ പ്രവേശിക്കുന്നത് രോഗബാധ വീണ്ടും രൂക്ഷമാകാന്‍ ഇടവരുത്തുമെന്ന വിലയിരുത്തലിന്റെ അടിസ്ഥാനത്തിലാണ് പുതിയ നടപടി.