റിയാദ്: കോവിഡ് വാക്‌സിന്‍ സ്വന്തമായി നിര്‍മിച്ചിരിക്കുകയാണു സൗദി. സൗദിയിലെ പ്രമുഖ എപ്പിഡെമിയോളജി പ്രൊഫസര്‍ ഡോ. ഇമാന്‍ അല്‍ മന്‍സൂറിന്റെ നേതൃത്വത്തിലുള്ള ഗവേഷക സംഘം വികസിപ്പിച്ച വാക്‌സിന്‍ ക്ലിനിക്കല്‍ ട്രയലിനു മുമ്പുള്ള പരീക്ഷണ ഘട്ടങ്ങളൊക്കെ വിജയകരമായി പൂര്‍ത്തിയാക്കികഴിഞ്ഞു.
ഇമാം അബ്ദുല്‍ റഹ്മാന്‍ ബിന്‍ ഫൈസല്‍ യൂണിവേഴ്‌സിറ്റിക്കു കീഴിലെ റിസേര്‍ച്ച് ആന്റ് മെഡിക്കല്‍ കണ്‍സല്‍ട്ടേഷന്‍സിലെ ഗവേഷകരാണ് സ്വന്തമായി കൊവിഡ് വാക്‌സിന്‍ വികസിപ്പിച്ചിരിക്കുന്നത്. വാക്‌സിന്റെ സുരക്ഷയും ഫലപ്രാപ്തിയും കൃത്യമായി മനസ്സിലാക്കുന്നതിനു വേണ്ടിയുള്ള ക്ലിനിക്കല്‍ ട്രയലിന് ആവശ്യമായ അനുമതി കാത്തുകഴിയുകയാണ് വാക്‌സിനെന്നും അധികൃതര്‍ അറിയിച്ചു. അനുമതി ലഭിച്ചാലുടന്‍ സൗദിയിലെ തെരഞ്ഞെടുക്കപ്പെടുന്ന വളണ്ടിയര്‍മാരില്‍ വാക്‌സിന്‍ പരീക്ഷണാര്‍ഥത്തില്‍ കുത്തിവയ്ക്കാനുള്ള ഒരുക്കത്തിലാണ് അധികൃതര്‍.
ചരിത്ര നേട്ടം കൈവരിച്ച റിസേര്‍ച്ച് ആന്റ് മെഡിക്കല്‍ കണ്‍സല്‍ട്ടേഷന്‍സിലെ ഗവേഷകരെ അഭിനന്ദിക്കുന്നതായി ഇമാം അബ്ദുല്‍ റഹ്മാന്‍ ബിന്‍ ഫൈസല്‍ യൂനിവേഴ്‌സിറ്റി അറിയിച്ചു. അതോടൊപ്പം, ഗവേഷണത്തിന് ആവശ്യമായ സാമ്പത്തിക സഹായം നല്‍കിയ സൗദി വിദ്യാഭ്യാസ മന്ത്രാലയത്തിനും അധികൃതര്‍ നന്ദി പറഞ്ഞു. അറബ് മേഖലയില്‍ ആദ്യമായാണ് ഒരു രാജ്യം കൊവിഡിനെതിരായ വാക്‌സിന്‍ വികസിപ്പിച്ചതായി അവകാശപ്പെടുന്നത്. സൗദി ഗവേഷകര്‍ വികസിപ്പിച്ച വാക്‌സിനെ കുറിച്ചുള്ള ഗവേഷണ പ്രബന്ധം ഇതിനകം ബ്രിട്ടീഷ് മെഡിക്കല്‍ പ്രസിദ്ധീകരണമായ ഫാര്‍മസ്യൂട്ടിക്കല്‍ ജേണലില്‍ പ്രസിദ്ധീകരിച്ചു കഴിഞ്ഞു.
